مغلق للتحسينات

"القلب الذي طلبته قد يكون مغلقا ..يرجى عدم إعادة المحاولة في وقت لاحق"

اه أنا قررت أقفل قلبي شوية وأعمل فيه عمرة ، حخرج كل الناس اللى فيه بره وحهد وابنى من أول وجديد

قررت انى اغير تقسيماته خالص، حقسم مساحاته من أول وجديد

وحعمل مكان خاص لكبار الزوار ححط فيه بابا وماما وأكيد طنط "اللى ميعرفش مين طنط يبقى لسه معرفنيش"

حقسمه زى علب الكبريت اللى بيسكن فيها الشباب دلوقتى، وكل واحد حيبقى له مساحة صغيرة يتحرك فيها واللى حيفكر مجرد التفكير انه ينقل من قسم لآخر حطلعه بره خالص "قلبي وأنا حرة فيه ، التوزيع القلبي ده من اختصاصي أنا".

حستخدم عوازل لجدار القلب وحامى من الصدمات حتى لا يتأثر بالجروح خاصة تلك التى تأتى من الأصدقاء وبعدها حاستخدم السيراميك حتى لا يتأثر قلبي بسخونة المشاعر ويبقى محايدا يعامل الناس بود ومحبة ولا يعامل أحد بشكل استثنائي.

كمان حيبقى فيه عازل للصوت عشان لما يبقى قلبي مجروح محدش يسمعه أنينه.

ايه كمان .. لون السيراميك حيبقى بنفسجي ولو ربنا فتحها عليه ممكن أعمله بورسلين ، مانا مش حستخسر في قلبي

حعلق يافطة مكتوب عليها "مغلق للتحسينات.. ممنوع الاقتراب أو التصوير".

واللى حيقرب خلال هذه الفترة حصب عليه كميات كبيرة من الكراهية الحارقة اللى حستوردها من بره ليصبح قلبي متعادلا.

وكلكم طبعا مدعويين في الافتتاح الكبير بس ربنا يستر وماتبقاش عملية قلب مفتوح.