عوانس من أجل التغيير

تغيرت اليوم مقاييس اختيار الزوج والزوجة كما تغيرت طريقة الحوار بين المخطوبين فلم تعد تغلفها الرومانسية كما كانت إنما تظهر حالة من الصراع الخفى بين الطرفين.

فقد تفاجأ ببنت تخاطب خطيبها قائلة " انت بتدى كل الناس على قفاها لكن أنا عندي وتقف" ، وده كان رد فعلها لانه بيحب واحدة تانية لكن في نفس الوقت بتقول انها نزوة (مش عارفة نزوة ايه أيام الخطوبة ،أمال بعد الجواز حيعمل ايه؟).

المهم انها لم تكتشف إلى الآن أن خطيبها (ربنا يحميه لشبابه) بيحكى لواحد صاحبه على كل حاجة تخص خطيبته وأنه عاوز يسيبها بس هي اللى ماسكة فيه .

فوجئت بواحدة تانية تعبر عن اعجابها الشديد بخطيبها فتخاطب أختها قائلة "ده بيشتم شتايم" وحتبقى فرحانة أكتر ان شاء الله لما يقولها الشتايم دي بعد الجواز ان شاء.

الظاهر الأخلاق بقت موضة قديمة والجملة اللى كنا بنسمعها زمان " ده ما تطلعش منه العيبة" بقت خلاص حاجة قديمة.

الموضوع ده فكرني بحديث الرسول صلى الله عليه وسلم الذي يقول فيه إن جاءكم من ترضون دينه وخلقه فزوجوه فلأول مرة في حياتي أحس إن الأخلاق دي شئ نسبي و يختلف تقييمها من شخص لآخر.

طب نسيب البنات شوية ونشوف الشباب اللى حالتهم بقت لا تشجع أي بنت انها تفكر مجرد التفكير في الزواج، منهم من يعتمد على أهله بصورة كبيرة جدا يعنى بابا وماما بيعملوا كل حاجة لدرجة اني سمعت عن شاب تدفع له والدته ايجار السكن الذي يعيش فيه مع زوجته رغم انه يملك شقة تمليك إلا أنها تبعد عن بيت أمه بمسافة بعيدة وقد قامت والدته بفرش شقة الزوجية من كافة مستلزمتها لدرجة متابعتها لما يقوم به العمال في الشقة.

واحد تانى خاطب واحدة وبعد فترة اكتشفت العروسة انه بخيل فقررت تنهى الموضوع فتدخل والد خطيبها ليحسن صورة ابنه بيقولها ايه "انت معرفتيهوش كويس ابني مش بخيل ،ده حتى بيصرف مرتبه أول كل شهر وياخد منى فلوس".

ولو اتكلمنا عن جواز الصالونات واللى بيحصل فيه حنحتاج بقى لصفحات ،وأكتر حاجة بتتكرر دايما أن العريس ميلاقيش حاجة يتكلم فيها فيقعد يقول أنا عندي شقة فين وشاليه في الساحل الشمالي وعربية ومرتبي مش عارفة كام وكأنه مقدم على شراء شقة أو أى حاجة، مش مهم يتعرف على الانسانة اللى حيتجوزها ، مش شكلها حلو وباين عليها انها متدينة خلاص بس أهم حاجة متكونش معقدة يعني تخرج معاه ويمسك ايدها ويعملوا خطوبة لا تختلف كثيرا عن الفرح عادي مش بقوا مخطوبين ، ناس كتيرة مبقتش بتفرق بين الخطوبة وكتب الكتاب بلاش عقد يا عم بقى!!

كمان ممكن العريس يقعد يتكلم عن نفسه وأهله وعماته وخالاته وأصدقاؤه وشغله وأسامي الدلع بتاعته(مهمة جدا) والبنات اللى كان مرتبط بيهم قبل كده ... ماهى لازم تعرف عنه كل حاجة عشان تقرر انها ترتبط بيه ، كل ده من غير ما يديها فرصة حتى تفتح بقها وبعد كام ساعة كده لما تيجى تمشي يقولها أنا معرفتش عنك حاجة!! ساعتها بقى مش مفروض ترد خالص تسيبه وتمشي.

مواقف كثيرة تحدث من حولنا كل يوم تؤكد تغير لطبيعة الرجل والمرأة

فالرجل اختلفت صورته بشكل كبير عن الرجل زمان اللى عنده نخوة اللى يفور دمه لما يشوف مراته خارجة بحاجة ضيقة شوية أو بتكلم حد غريب ، الراجل اللى كان بيغيرعلى مراته وبناته ، الراجل المصري الشهم اللى يجري يساعد أى حد محتاج له.

أخاف ان يأتى اليوم الذي نتحدث فيه عن الأخلاق والرجولة على أنها أشياء تراثية كان يملكها أجدادنا "ربنا يستر" كما نتحدث عن الفراعنة وأمجادهم.

وبما أنى منحازة للمرأة طبعا ومن أجل كل ما تقدم أدعو إلى إنشاء حركة جديدة تحت اسم " عوانس من أجل التغيير" تدعو هذه الحركة إلى مقاطعة البنات للزواج من هذه النوعية من الرجال والاتجاه إلى العنوسة في حالة عدم وجود الزوج المناسب كما سنعمل على تغيير المفهوم السئ للعنوسة وعلى من تجد في نفسها القليل من السخط على الوضع الذي آل إليه الرجال ان تنضم إلينا في أقرب وقت.